Նյու Դելիում կայացել է Անի Երեմյանի հեղինակած «Տարածքներ պատկանելությունների միջև. Հնդկաստանում հայկական սփյուռքի համայնքները» գրքի շնորհանդեսը

11 մայիսի, 2026

Մայիսի 11-ին Նյու Դելիի «India International Centre» մշակութային կենտրոնում կայացել է Անի Երեմյանի հեղինակած «Տարածքներ պատկանելությունների միջև. Հնդկաստանում հայկական սփյուռքի համայնքները» գիտական աշխատության հիման վրա «Taylor & Francis» առաջատար ակադեմիական հրատարակչության կողմից լույս ընծայած գրքի շնորհանդեսը:

Միջոցառմանը Հնդկաստանում ՀՀ դեսպան Վահագն Աֆյանն իր խոսքում նշել է, որ նման աշխատության հրատարակումը ևս մեկ առիթ է անդրադառնալու հայ-հնդկական պատմամշակութային խորը կապերին և երկու ժողովուրդների փոխադարձ ճանաչողության ամրապնդմանը՝ հիշատակելով, որ դեռևս մ.թ.ա 150-ական թվականներին Հայաստանում ապաստան են գտել հնդիկ իշխաններ, ինչպես նաև 1600-ական թվականներից մինչև 1800-ականներ Հնդկաստանում հաստատված են եղել հայ առևտրականներ և տարբեր գործիչներ: Դեսպանը նաև ընդգծել է, որ թե՛ Հայաստանի և թե՛ Հնդկաստանի ընդհանրությունների ու առանձնահատկությունների բնորոշ գծերից են բազմակարծությամբ օժտված արտերկրի մեծաքանակ համայնքները։

Շնորհանդեսին հատուկ հյուրի կարգավիճակով մասնակցել է Մշակութային կապերի հնդկական խորհրդի (ICCR) գլխավոր տնօրենի տեղակալ Ռաջեշ Ռանջանն, ով իր խոսքում, ևս անդրադառնալով երկու երկրների ժողովուրդների պատմական սերտ շփումներին, կարևորել է նման հրատարակումների նշանակությունը:

Ողջույնի խոսքով հանդես է եկել նաև հրատարակչության ներկայացուցիչը:

Այնուհետև աշխատության մասին քննարկումներ են ծավալվել գրքի հեղինակի՝ Հնդկաստանում ՀՀ դեսպանության երկրորդ քարտուղար Անի Երեմյանի և միջոցառման մասնակից հնդկական հեղինակավոր պրոֆեսորադասախոսական կազմի անդամների միջև:

Երեկոյին ներկա էին դիվանագիտական, ակադեմիական և ուսանողական շրջանակների, ինչպես նաև փոքրաթիվ հայ համայնքի ներկայացուցիչներ

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր